سلمت لك مفتاح قلبي وقفيت
حتى عيوني جتك مني هديه
احفظ قليبي كان اناعنكم ابطيت
تراه مثل الشهد وسط الخليه
لا تجرحه ياطيب الذكر والصيت
قلبي رقيق ما يحب الاذيه
لا تخبره باني عنه يوم صديت
ولا ترتكب في حق قلبي خطيه
هو منوتي بين البشر لا تمنيت
عاش بقفص صدري سنينا مديه
ماقال انا من جور الايام مليت
صابرعلى الطعنات صبح وعشيه
كم مره في حقه اجحفت واخطيت
وانا فؤداي يغفر الذنب ليه
وكم ليلة من زفرة القلب ونيت
ومن زفرتي هلت دموعي عليه
انا اعترف باني مع القلب موفيت
غلطة وصارت بعد شهر الضحيه
مدري وش اللي صابني يوم زليت
شيطان مارد فربك العقل ليه
في لحظة استسلام جاني ولا اوعيت
الا ونا معطيه كل القضيه
قلب حياتي في شهر ما تعديت
اصارع احزاني وقلبي ضحيه
فقدت طعم الانس ساعة تجنيت
وش حيلتي ياناس من ذا البيليه
كيف استعيد اللي ذهب يوم جنيت
هل تسمح اضروفه يسلم عليه
آخر أمل في سجدتي يوم صليت
دعوه تخالطها دموعا جريه
اغفر ذنوبي قبل ما فارق البيت
واللي رحل يهنأ بعيشه هنيه

منقوول