التصنيف: العلم

خلاص السنة قربت تخلص
والامتحانات على الأبواب
وأكيد أنت دلوقتي قاعدة حاطة إيدك على خدك مش
عارفة تعملي إيه؟!
وحاسة إنك وراك حاجات كتير عايزة تذاكريها وطبعا
الوقت قدامك بسيط جدا
وعلشان إحنا دايما معاك في كل الأوقات
والأزمات
عملنا لك الروشتة السريعة دي
يلا نشوف مع بعض
-1-
ابعدي عن روح السلبية

حاولي تبعدي عن روح السلبية والاستسلام اللي ممكن تسيطر عليك قبل الامتحانات، زي مثلا إنك تقولي بينك وبين نفسك إن الوقت خلاص فات على المذاكرة، وإن المواد صعبة وأنت مش هتقدري تخلصيها كلها، وإن مفيش حاجة في إيدك ممكن تحققيها في الوقت الصغير اللي فاضل، وأحسن حاجة ممكن تعمليها علشان تتخلصي من الروح السلبية دي هي إنك تبدئي تذاكري وتعملي كل اللي عليك، واعرفي إن ربنا مش ممكن يضيع لك تعبك.

-2-
حطي قدامك هدف

علشان تقدري تبدئي تذاكري وتركزي في مذكراتك يبقى لازم تكوني حاطة قدامك هدف نفسك تحققيه، وده لأن وجود أي هدف حتى ولو كان بسيط هيفرق كتير أوي معاك وهيشجعك على المذاكرة.

-3-
اعملي مزج بين السهل والصعب

لو كان عندك مواد كتير ومش عارفة تبدئي بمذاكرة إيه يبقى خليك ذكية وهات مادتين من المواد اللي عندك بحيث تكون واحدة فيهم صعبة وتقيلة في مذاكرتها، والتانية تكون خفيفة وسهلة علشان لما تزهقي من مذاكرة المادة الصعبة تذاكري المادة السهلة، وبكده يبقى أنت عاملة توازن بين المواد.

-4-
اعملي جدول

اعملي جدول واكتبي فيه تاريخ بداية مذاكرة المادة اللي ناوية تذاكريها، وتاريخ الانتهاء منها، وأعط لنفسك وقت كفاية لكل مادة علشان ما تشعريش إنك مضغوطة في المذاكرة، وماتنسيش إنك تكوني مراية لنفسك وتشوفي إيه اللي أنت حققتيه وإيه اللي لسه ما حققتيهوش، وحاولي تعرفي إيه هي المشكلة اللي خلتك تتأخري في الانتهاء من مذاكرة المادة وحاولي تلاقي لها حل.

-5-
جهزي مكان مناسب

اختاري أي مكان في البيت يكون هادي ومفيش فيه أي مصدر للدوشة علشان تقدري تركزي، كمان جهزي كرسي يكون مريح في الجلوس لأنك هتقعدي عليه لوقت طويل جدا، وياريت تكون الإضاءة كويسة جدا في المكان اللي أنت هتذاكري فيه، وياريت تبعدي عن المذاكرة على السرير لأنها هتديك إحساس بالنوم والخمول، وإحنا مش عايزين كده طبعا.

-6-
خدي قسط كفاية من النوم

اوعي تفكري إنك علشان تذاكري وتخلصي المواد اللي عندك يبقى المفروض تقعدي باليومين والثلاثة من غير نوم، وده لأنك لو قعدت فعلا لمدة طويلة من غير نوم هييجي عليك وقت وتتعبي وتفقدي كل تركيزك وتقعدي فترة طويلة على بال ما يرجع لك نشاطك تاني وبكده يبقى أنت ضيعت وقت أكتر من الوقت اللي كان ممكن تنامي فيه وتريحي، علشان كده بقولك إن المفروض تنامي كويس يوميا 8 ساعات، وكمان لو حسيتي في أي وقت إنك تعبانة وعايزة تنامي نامي على طول لأن في الوقت ده جسمك بيكون مرهق جدا، ومحتاج يرتاح، وده أفضل من إنك تقعدي وأنت مرهقة لأنك مش هتقدري تستوعبي كويس.

-7-
اختاري الوقت المناسب

فيه ناس كتير بتحب تذاكر بالليل وبتلاقي إن أكبر تركيز لها في المذاكرة بالليل، وفيه ناس تانية شايفة إن أحسن مذاكرة هي فترة الصباح الباكر، وفيه ناس تانية شايفة إن تركيزها بيكون أثناء النهار… علشان كده بقولك شوفي الوقت المناسب واللي بتكوني فيه مركزة، وذاكري فيه بس اوعي تنسي إنك تدي لجسمك قسط كافي من النوم يوميا.

-8-
خلي عندك وقت للترفيه

حاولي تدي لنفسك ساعتين راحة في نص اليوم، وفي الساعتين دول ابعدي عن المذاكرة نهائي، اتفرجي على التليفزيون، أو ادخلي المطبخ، واعملي أي أكلة بتحبيها…
واوعي تنسي تعملي استراحة لمدة ربع ساعة بين كل ساعتين مذاكرة، وقومي من مكانك أو غيري المكان اللي أنت قاعدة فيه، أو اقفي في البلكونة، أو غمضي عينك وافتحيها تاني، أو أي حاجة تانية، بس المهم تجددي نشاطك وخدي بالك إنك لو ماعملتيش كده هتزهقي ومش هتقدري تكملي.

-9-
أشركي كل حواسك

حاولي تشركي كل حواسك في المذاكرة، كاستخدام اليد في كتابة الأشياء المهمة، والعين للقراءة والتحدث إلى نفسك عن الموضوعات اللي بتقومي بمذاكرتها، وذلك لزيادة التركيز.

-10-
اعملي ملخص

اعملي ملخص بسيط عبارة عن مجموعة من العناصر لكل موضوع، وركزي في العناصر دي على قد ما تقدري لأنها مفيدة جدا في الامتحان، وهي اللي هتفكرك بالموضوع ككل.

-11-
اهتمي بنوع غذائك

أنصحك دايما إنك تحرصي إن غذائك يكون متكامل ومتوازن ويحتوي على جميع العناصر الغذائية اللي الجسم محتاج لها، وبنأكد على النصيحة دي بشدة أيام الامتحانات، علشان كده بنقولك ياريت أيام الامتحانات تكتري من تناول الفواكه الطازجة والخضروات الغنية بفيتامين (C) وفيتامين (B)، لأن الحاجات دي مهمة جدا في تقوية الجهاز المناعي للإنسان، وخاصة عند الإرهاق أو السهر والمذاكرة المستمرة، كمان احرصي على تناول الأطعمة الغنية بالحديد وده لأن نقص الحديد بيؤدي إلى الإجهاد وقلة التركيز وصعوبة التذكر، واوعي تنسي تشربي كل يوم قبل ما تنامي كوب من اللبن الحليب لأنه مفيد جدا في تهدئة الأعصاب قبل النوم.

-12-
ماتكتريش من المنبهات

ماتسمعيش كلام حد يقولك إنك لازم تشربي كل يوم 8 كوبايات قهوة أو شاي علشان تقدري تركزي وده لأن الإكثار من شرب المنبهات أيام المذاكرة والامتحانات مضر جدا ومش مفيد زي ما كل الناس فاكرة.
وقبل ما نقول سلام

بنقولك اوعي تنسي تذكري الله دائما وتستعيني بالله قبل ما تبدئي في المذاكرة كل يوم

ولغاية كده وخلص كلامنا النهارده

مستنيين نعرف منك رأيك إيه؟!

مع أطيب التمنيات بالنجاح والتوفيق الباهر

سلام